Kneißllied
1. I bin von Weigertshofen, des sag i ungeniert,
mei Vata war a Müller, der Paschkoline Wirt.
Mei Muatta war a Zwergal vom Paschkoline Kern,
drum hört des Hexnweiberl de Burschngsangl gern.
2. In der Schachermühl geht's lustig zua, des war a Lebn so fein,
der oa hat gstohln a Schafi, da anda gar a Schwein.
Da hamma oftmals gschlachtlt, frische Bluatwürst hat´s da gebn,
des war ja in da Schachermühl a ganz a lustigs Lebn!
3. In der Schachermühl geht's lustig zua, bis schließlich is Alarm,
bis dass de Gschicht is kemma wohl unter die Gendarm.
Mei Muatta, de hams gschlossn, mir Buama, mir san davo,
an Vata hams daschossn, den ehrenbravn Mo.
4. Jetzt lies i aus da Zeitung raus: D' Schachermühler san verhaft´.
Da hams uns halt schö spöttisch auf Dachau einigschafft.
Des Urteil, des hat ghoaßn, des war ja gar net fein,
hat ghoaßn: Sechs Jahr Zuchthaus ins Kloster nach Kaisheim.
5. Vom Zuchthaus bin i aussi, war wieder a frischer Bua,
i hab aa wieda g'arbat, doch d' Leut lassn mia koa Ruah.
Da Moaster, der werd zwunga, muaß mir mei Zeugnis gebn,
na muaß i wieda rutschn ins Vagabundenlebn.
6. Es war bei Altomünster, war dunkl und scho finster,
da kemman zwoa ins Haus, mia sitzn eben beim Schmaus.
Da Fleglbauer, sagt: „Geh Hiasl, sei net zwida,
nimm do ausser dein Drilling und schiaß de zwoa glei nieda!“
7. Jetzt lies i aus da Zeitung, des Ding is unerhört:
An Kneißl Hias sei Köpfi is tausend Markl wert!
Der wo de tausend Markl will, der braucht net lang studiern,
mei Drilling, der is gladn, er derf´n grad probiern.
8. Es war am vierten März, in aller Herrgottsfruah,
da ging´s in Geisenhofen so sakramentisch zua.
Hundertsechzig Mann san aufmarschiert, zwei Kommissär, ein Arzt,
da hat sich da Kneißl Hiasl hinter die Ohrn a bissl kratzt.
9. Auf Kommando „oans, zwoa, drei!“ fliagn tausend Kugln nei,
da Dachstuhl, der hat zittert, des Dacherl fallt glei ei.
Der Hiasl musste retouriern wohl hinter den Kamin,
des war fürn Kneißl Hiasl a scheißlicher Termin.
10. Dass an Kneißl Hiasl gfanga ham, des is uns wohl bekannt,
zum Krüppl hams´n gschossn, des woaß des ganze Land.
Ois Krüppl hams´n transportiert, a sechs, a acht Gendarm,
es war ja in der Münchner Stadt a fürchterlichs Alarm!
11. Drei Tag hat d' Sitzung dauert, an Hiasl hams verdonnert,
zum Tod hams ihn verurteilt, da hat sich alles gwundert.
Hättns eahm doch fünfzehn Jahrl gebn, er laffat net davo,
da Fleglbauer ist freiganga, der „ehrenbrave Mo!“
16. In Augsburg hams koan Bada ghabt, der an Kneißl kunnt rasiern,
jetz müassns wegn dem Teifiskerl auf Minka telefoniern.
Da beste Bada z´ Minka, der hat des Ding probiert
und hat an Kneißl Hiasl zum letzten Mal rasiert.
17. In Notstuih hams´n eini, wia ma d' Ochsn bschlagn duat,
beim letznmal Rasiern is gflossn no a Bluat.
Der Kerl, der hat grad z'arbatn, des war a wahrer Graus.
Mei Liadl is jetzt gsunga, mitm Kneißl is´ jetz aus!
